បាត់ដំបង៖ ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ សម្តេចក្រឡាហោម ស ខេង បានអំពាវនាវដល់អាជ្ញាធរពាក់ព័ន្ធនឹងការបោះឆ្នោតខាងមុខ ឱ្យរៀបចំផែនការលម្អិតដើម្បីបំរើឱ្យការការពារសន្តិសុខឱ្យបានល្អ ដើម្បីលើកកម្ពស់សិទ្ធិប្រជាធិបតេយ្យ។

ថ្លែងក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២១ និងលើកទិសដៅការងារប្រចាំឆ្នាំ២០២២ របស់រដ្ឋបាលខេត្តបាត់ដំបង នាថ្ងៃទី១០ ខែមីនា ឆ្នាំ២០២២ នៅក្រុងបាត់ដំបង សម្ដេចក្រឡាហោម ស ខេង មានប្រសាសន៍ថា៖ «ការធានាឱ្យបានសន្តិសុខនេះគឺជាកិច្ចការចាំបាច់ដើម្បីបង្ហាញឱ្យអន្តរជាតិឃើញពីភាពរីកចំរើន និងចាស់ទុំខាងនយោបាយនៃគ្រប់ភាគី និងការទទួលខុសត្រូវខ្ពស់របស់អាជ្ញារដ្ឋបាលកម្ពុជាក្នុងការលើកកម្ពស់លទ្ធិប្រជាធិបតេ្យសេរីពហុបក្ស»។

ការបោះឆ្នោតក្រុមប្រឹក្សាឃុំសង្កាត់អាណត្តិទី៥ ឆ្នាំ២០២២ នឹងចាប់ផ្ដើមនៅថ្ងៃទី៥ ខែមិថុនា ឆ្នាំ២០២២ ដើម្បីជ្រើសរើសសមាជិកក្រុមប្រឹក្សាថ្មីជំនួសក្រុមប្រឹក្សាឃុំសង្កាត់ចាស់ដែលផុតអាណត្តិ។ គណៈកម្មាធិការជាតិរៀបចំការបោះឆ្នោត (គ.ជ.ប.) បានប្រកាសថាមានគណបក្សសរុបចំនួន ១៧ បានចុះឈ្មោះចូលរួមការបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅថ្ងៃទី៥ ខែមិថុនា ដោយមានបេក្ខភាពសរុប ៨២ ៧៨៦នាក់ ក្នុងនោះមានបេក្ខភាពជាស្រ្តីសរុប ២៥ ៩៦៣នាក់៕